طباخة فجأة

= = = =

صحيت من نومي بواقعة مفاجأة

لقيت أمي طالبة طبخة مني فجأة

يدوب اصحي ارتب سريري ودولابي

وممكن أساعد واغسل صحوني يا ربي

وكبيري أجهز عيش وبتنجان بالدقة

وعصير سكر وليمون وماية رايقة

لقتني بطبخ فراخ بطاطس ورز بذوقي

وعلى السفرة ارتب وأذوق أهلي أطباقي

وأحلى مفاجئة طلعت طباخة جامدة

مفيش مستحيل ده أنا بنت صامدة

وكلمة معرفش راحت من قاموسي

ده أنا طباخ بريمو حافظة دروسي

يلا سلام ما تنسوا معادنا في حلقة جايه مع مغامرة جديدة  

 

يوميات شيماوية .. يوميات بنوتة مصرية ** الحلقة الخامسة : ماليش فى الطبيخ

طوووووووووبعا كل بنوتة فينا متقدرش تنسى اول طبخة ليها انا بقة قصتى مع الطبيخ و قصة اول طبخة ليه متتنسيش طوبعا كلكم متوقعين ان هيكون فى كارثة مطبخية ههههههههههه اصلى انا كنتش احب الطبيخ بصراحة و بما ان كنت البنوتة الصغيرة فكانت اختى الكبيرة هى اللى متوليه موضوع الطبيخ دهون و عشان هى مش بتحب غسيل المواعين فكنت انا تخصص غسيل المواعين و بصراحة انا لغايت النهاردة بحب غسيل المواعين اوى و اقولكم على سر اكبر انا ايام الدراسة كنت ارسم مسائل الهندسة بالصابون على السيراميك قصادى و انا بغسل المواعين ههههههه و اى مسالة هندسية تقف فى وشى اقوم اغسيل لى طبقين و افكر فيها و هى قصادى و كنت اول ما الاقى الحل اجرى بسرعة اكتبه و كانى اكتشفت اكتشاف ههههههههههههههه و اقولكم على سر اكبر و اكبر معظم قراراتى باخدها و انا بغسل المواعين لانى مش من النوع اللى يفضل قاعد و يسرح كده ههههههههههه لالا انا كنت اقف اغسيل كام طبق على كام حلة و انا بكلم نفسي لغايت لما اوصل لقرار ههههههههههههههه

كل علاقتى بالمطبخ كانت غسيل المواعين و ماليش علاقة باى حاجة تانى حتى تنطيف البيت كان على اختى الكبيرة و لما كانوا بيطلبوا من اى حاجة اعملها ولو بسيطة اعمل منها مشكلة عشان يبطلوا يطلبوا ههههه لدرجة ان فى مرة اتخانقت مع اخويا الكبير و انا بعمل الشاى بلبن لانى كنت مصممة ان اسمه شاى بلبن فلازم الشاى يتحط الاول قبل اللبن و هو يقولى اه اسمه شاى بلبن بس اللبن الاول هههههههههه و افتكر ان من ساعة ما اتخانقت بقة هو اللى يعمل الشاى بلبن ارحم له هههههههه و لما كانت ماما تطلب منى اعمل الارز اقوم مغرقاه ميه او احرقه عشان ميتاكلش فتقوم متطلبش ههههههههه لغايت لما زهقوا منى و كانت اكبر حاجة اعملها انى اقلى البرنجان و اخلله اصلى كنت بحبه اوووووى و كنت بموت فيه فطبعا كان لازم اعمله بنفسي هههههه فضلت كدهون لغايت لما جيه اليوم الموعود ماما نزلت مع اختى الكبيرة و خطيبها اللى هو دلوقتى جوزها يشتروا حاجة الجهاز و اتاخروا برة اتفاجاءت بماما بتتصل بيه شيماء انا مطلعة فرختين عندك اتصرفى اعملى اى حاجة لاننا واقعين من الجوع وقفلت السكة !!!!!!!!!!!!!!

طوبعا بقيت اضرب حيص بيص اعمل ايه يا امى بسن انا كبيرى غسيل المواعين اتصلت بخالتى الحقنى يا خالتووووووو اعمل ايه اتصرف ازاى قالت لى اهدى بس و اعملى اللى هقولك عليه و اديتنى خطوات صينيه البطاطس فى الفرن و الفراخ بالبصل و طوبعا الارز انا كنت عارفة يتعمل ازاى ما انا كنت ببوظه هههه و كتبت الخطوات كلها و منكرش ان اليوم دهون اخواتى ساعدونى اللى روق الشقة و اخويا الكبير وقف معايا و قالى من اولها انا هغسل لك المواعين بس عشان شكلك صعب عليه مع انه بيعرف يطبخ لانه كان بيشتغل بعيد و بيجي كل 3 اسابيع اجازة اسبوع واحد بس مرضيش يقولى اعمل ايه ههههههه و كان واقف مبسوط بحوستى جوه المطبخ و كنت كل شوية ابص فى الورقة و اشوف اعمل ايه و الحمد لله عملت كل الخطوات و كل شوية كنت اتصل بخالتو حبيبتى يا خالتو وخلصت كل الحاجات المطلوبة و بينى و بينكم مرضتش ادوق اى حاجة حتى و انا بحط الملح كنت بدوق حد من اخواتى ههههه يمكن لانى كنت واثيقة من ان الاكل مش هيطلع كويس .. و جات ماما و اختى و خطيب اختى اللى هو جوزها دلوقتى و اول ما دخلت قالت لى حطى الاكل يا شوشو احنا على اخرنا حطيت الاكل و سيبتهم هما ياكلوا الاول وقمت عملت حجتى انى بجيب ميه ساقعة و سيبتهم ياكلوا لغايت لما ملاقتش اى تعليق قولت الحمد لله كدهون يبقى من جوعهم معلقوش ههههههه و قعدت معاهم و بقيت ابص لهم و مش قادرة امد ايدي اكل لغايت لما اخويا الكبير قالها تفتكرى مين اللى عمل الاكل قالت له انت اكيد قالها لا دى شيماء و عملته كله من الالف للياء ماما استغربت قالت له بجد انت بتتكلم بجد قالها اصل بنتك دهين بمزاج لما يكون ليها مزاج تعمل حاجة بتعملها صح طب بزمتك ايه رايك فى الاكل انا اتفاجاءت من علامات الزهول اللى كانت على وش ماما و اختى الكبيرة و لاقيتهم بيقولوا مش ممكن ده طبيخ شيماء .. طوبعا انا بقيت اقول بينى و بين نفسي اسكت يا اخى ماهم كانوا بياكلوا و هما ساكتين اهو دلوقتى كله هيسيب الاكل هههههههههه لاقيت ماما بتقولى ماانتى اروبه اهون و بتعرفى تعملى اومال كنتى بتدلعى علينا ليه و اختى الكبيرة ما صدقت و قالت تصدقى يا ماما اكتر حاجة كنت قلقانة منها بعد جوازى بنتك و اللى هتعمله فيكم بس دلوقتى اطمنت لما بتتزنق بتعمل اكل حلو . سكت كده قولت ايه ده اروبه و اكل حلو ايه ده هو الاكل حلو بصحيح ولا بيدبسونى عشان ابقى اطبخ بعدن كدهون و اضطريت امد ايدي اكل الله ايه ده انا اللى كنت بقول ماليش فى الطبيخ طلعت بعرف اطبخ طلعت اروبة ياجووووووووودعاااااان هههههههههه

طبعا رغم انبساطى ان الاكل عجبهم و ان اول اكل ليه اعمله كان حلو بجد و انا نفسي اتفاجاءت بنفسي بس من يومها و انا بندم اشد الندم لانى بقيت اطبخ و مبقاش ليه حجة و اقول معرفش ههههههههه.. و شيلت كلمة معرفش و ماليش فيه من قاموس حياتى نهائي و بقيت بجد اجرب اعمل كل حاجة ماهو مينفعش اقول معرفش و ماليش و انا مجرتبش اصلا مش كده ولا ايه ؟؟؟؟؟
تعالوااااااااا هوووووووووونا رايحين فين كل واحدة توعتورف امتة اول مرة وقفت فى المطبخ و ايه اول طبخة عملتها ؟؟ يالله كله يقعد على كرسي الاوعتورفات