= = = = = =
أنا كائن متفتح طول عمري
لكن فجأة بقيت متقوقع
وجوه قوقعتي
عالم تاني كله دوشة
كركبة لخبطة
خبط وتخبيط
لكن بنظام يراعي البني آدميين
في سياسة آه والله سياسة
لكن منتظمة على حد السيف
لا غش ولا خداع
لا كدب ولا نفاق
ولا لعب كوتشينة و7 ورقات
وفي فن وكوره
لكن إيه يا سلام
حاجة نضيفه بأخلاق
لها هدف مش أي كلام
مفيش عبي وزع كوش يا شقيق
والدين يلا مقلوكش
الكل حافظ فاهم
مستوعب بضمير
مش بس شريط يكرر ويعيد
جوه قوقعتي
الكل حنين خايف ع التاني
والدنيا ماشية من غير أي مشاكل
أصل مشاكلها معروفة
وأخرها على الله متروكة
ما إحنا نسعى ونعمل اللي علينا
والباقي نقول يارب أحمينا
ولهذا
أنا بعشق قوقعتي
جواها بحل مشاكلي
وأخرج تاني للدنيا
أعمل اللي عليا
واستنى ربي يفرجها
في معاد محتوم
أنا كائن متقوقع
لكن مش خايب
ولا قليل الحيلة
ومش راضي عن حالي
ولا عن الحلوة بلادي
وبدور بالعقل ع حلول
ومسيري في يوم
أقلب للدنيا من تاني
ويسمع حسي كل الكون
أنا كائن متقوقع
لكني غلباوي
في ثانية أثور
على ظلم الكون
http://kenanaonline.com/users/ALWATANULARABY/posts/540308
