لف وأرجع تاني #حوليات

" لف .. وأرجع تاني " ، بصراحة ده ملخص قانون التظاهر الجديد ؛ " كمااا .. كُنت" ، " مفيش تظاهرات النهارده عددكم كبير" ؛ " المكان محجوز من شهرين لتظاهرة تانية مكونة من عيلين ونص" ؛ " مليش مزاج امضي على ورقة المظاهرة " ؛ " روح يبني هات ورقة من أتنين موظفين انك مؤهل نفسيا للخروج في مظاهرة " ؛ " أنتي يا بنتي روحي جيبي باباكي يمضي على موافقته تضربي في المظاهرة الجايه " ، " أقف في الصف يبني المظاهرات يمين والشكاوى شمال ".

 

مش مقتنعة أن كل ما الناس تتخنق من البلد واللي بيحصل فيها عشان تعترض تروح تمضي ورقة من الباشا مأمور القسم ، هو اللي حصل في ثورة يناير ومن بعدها يونيو إيه ؟؟!! ، كان تظاهر قلب بثورة شالت الريس ؛ يا حبيبتي يا ثورة ، مكنش يومك يختي ، دبحوكي وبيقطعوا فيكي حته حته ، كل شوية حد ينط ؛ يتنطط ويلعب وشوية ينسى نفسه ؛ ويقولك أنا حامي حمى الثورة المجيدة ، خلصنا من أتنين مش واحد مجلس عسكري فاشل ورئيس أُنِتِخَب وأثبت ضعفه ، ومع ذلك محدش بيحرم ، من تاني بدأت العفاريت تظهر تتنطط ، ويقولك بحمي وبحافظ.

يا سيدي أحمي نفسك أنت بس الأول ، كبيرك أسبوع ويانا وهتشوف أيام سود ولا قرن الخروب ، هتقول الدستور وتنزلوا تقولوا رأيكم ، هيييي ضحكتني بالآوي ومليش نفس بصراحة كان غيرك أشطر ، مش كان في قبله واحد وقال نفس الجملة والدنيا أتقلبت وقولنا مينفعش ، قالوا عادي قولوا " نعم " وبعدين يتعدل كل ما هو مخالف ومش عاجب ؛ ونعمل دستور يعجب الكل ؛ وراحوا هما وأيامهم .. وراح هو كمان.

هو إحنا بنعيد تاني في نفس الكره ، ونلف نلف في نفس الدايرة ، جرى إيه ، صحصح .. فوق يلا شوية معانا ، مش بنعيد في المشروح من تاني ، قولت تظاهر متاح لكن ... بشروط ؛ لا بجد وهو انت لما الناس خرجت وقلبت الدنيا كان خروجها مشروط.

تقولي أنتي مبتخرجيش مظاهرات ولا عمرك خرجتي ولا ناوية تخرجي ، بتتكلمي في إيه وليه ، أقولك ده حقي صحيح مش بعمل بيه لكن ده مش معناه سيادتك تسرقه مني ، تقول تاني ده وسيلة لحماية البلد من الفوضى والعنف المتزايد الأيام دي ، أجوبك بأن معاك الحق والسلطات تعاقب بيها المخالف لكن مش مبرر تمنع المظاهرات أو تقننها بطريقتك وعلى مزاجك ، الموضوع شبة أم خايفه على أبنها من البرد حبسته في البيت وكل شوية تقوله خد أدوية مناعة في الأخر مناعته أدمرت بسببها مش بسبب كائن خارجي.

بدأت أقتنع أن الكرسي فيه مادة بتسمم كل من يقرب منه ويقلب له كيانه وينسيه إزاي وصل ؛ ويبدأ يتفرعن " ما هو قالوا زمان يا فرعون مين فرعنك قال ملقتش حد يلمني " واللي افتكرته موسى طلع فرعون " عجبت لك يا زمن ، لا .. لا الزمن ملوش علاقة عجبت ليك يا حاكم متفرعن على محكوم ؛ ويارب يارب تموت .. وقال إيه تظاهر "متاح بشروط" .. "لف وارجع تاني يا كتكوت" ، " أحذر الدماغ ترجع للخلف".

الأربعاء 27/11/2013م