الأربعاء، 11 ديسمبر 2013
الثلاثاء، 10 ديسمبر 2013
الفرحة #حوليات
الفرحة
من جوه قلوبنا مسروقة
وكأنها
بخيوط الحزن ملضومة
تشاغلنا
وتجري في ثانية
تلاعبنا الأوله ( الحجلة)
نطة يمين وتانية شمال
وفي غمضة عين
تروح من بين صوابعنا
الفرحة
ملك للسيرتون
مختفي وفجأة يظهر قدامك
جبار وقوي
يغير كل حياتك
ومن تاني
يختفي وحياتك
الفرحة
وردة وزهرة برية
ملهاش لا عزيز ولا غالي
تروح للي تحبه
تحب تلاغي وتشاغل
الفرحة
طفل بريء
عايش بمزاجه ورايق
لهموم الدنيا ولا داري
الفرحة
قوس ألوان
في حضنه نلعب وننام
وفي الأول والأخر
الفرحة إحساس جوه الإنسان
الثلاثاء
21/5/2013م الساعة 11 ص
الأحد، 8 ديسمبر 2013
نزوة #حوليات
كتباها من زمان بس لقيت انها مناسبة كاحد حقائق الحياة الكثيرة جدا التي نتعايش معها ونعيشها
نزوة
= = = =
مجرد نزوة وعدت تضيع وقت
لحظات عابرة وياه راحت ضاعت
مشاعر واهية فراغ نملاه
قصر خيالي بنيت بهواه
أحاسيس ومشاعر خايبه وغدارة
خدتنا حتى من نفسينا بكل مرارة
وفجأة فوقنا وورانا دماره واقعنا
دمعنا وبكينا وموتنا
جوه نفسينا
واهو طلعت مجرد نزوة لمزاج عالي
تضيع وقت لما يفرجها علينا المولى
السبت، 7 ديسمبر 2013
ملك الموت #حوليات
ملك
الموت بحصد في الأرواح ، عايش بتنقل بكل راحة وبراح ، قدر ونصيب عمر ومقدر ، مش
محتاج لسؤال وجواب ، للميت راحة ونعيم ، يا رحلة لجحيم وعذاب ، لينا قسوة وفراق لبعاد أحباب ، ما هو لكل بداية نهاية ، ولكل نهاية بداية ، ولكل موت ولادة ، وبين هذا وهذه ،
حياة كاملة ، سرد لرواية ، كتابة حكاية ، وقصص مروية ، وتتبع لحياة، خط سير نتبعه
، فيها مسيرون ، في حدود مخيرون ، ولما خلقنا له ميسرون ، بكتاب عليين ، بالأرض
الولادة والبداية ، وبالسماء الحساب والنهاية ، بداية النهاية ، لدنيا فانية ،
ونهاية البداية ، لآخرة متمناه.
هي دي كل الحدوتة ، وتوته توته فرغت الحدوتة ، مش نهاية عربية ولا هندية ،
دي نهاية بأيد رب كريم ربانية ، طريقين مفيش تالت نار وجنة ، وأنت وعملك يا عبد
وربك ورحمته ، واهي نهاية جواها البداية ، وبداية متعشق فيها النهاية ، وتدور
الدايره ، وتلف الدنيا ، والحيرة والتوهه في سنينا عايشه ، لا هي بتوقف ولا
بأيدينا في الترس نثبت ، ولما تركز تلاقي مش كل حاجة في الأساس هي دي طبيعتها ،
ولا كل أبيض في الأساس أبيض ده لونه ، ممكن بكل بساطة يكون وش بويه ، شوية نار
ويرجع أسود لأصلة.
الخميس، 5 ديسمبر 2013
كائن متوقع #حوليات
= = = = = =
أنا كائن متفتح طول عمري
لكن فجأة بقيت متقوقع
وجوه قوقعتي
عالم تاني كله دوشة
كركبة لخبطة
خبط وتخبيط
لكن بنظام يراعي البني آدميين
في سياسة آه والله سياسة
لكن منتظمة على حد السيف
لا غش ولا خداع
لا كدب ولا نفاق
ولا لعب كوتشينة و7 ورقات
وفي فن وكوره
لكن إيه يا سلام
حاجة نضيفه بأخلاق
لها هدف مش أي كلام
مفيش عبي وزع كوش يا شقيق
والدين يلا مقلوكش
الكل حافظ فاهم
مستوعب بضمير
مش بس شريط يكرر ويعيد
جوه قوقعتي
الكل حنين خايف ع التاني
والدنيا ماشية من غير أي مشاكل
أصل مشاكلها معروفة
وأخرها على الله متروكة
ما إحنا نسعى ونعمل اللي علينا
والباقي نقول يارب أحمينا
ولهذا
أنا بعشق قوقعتي
جواها بحل مشاكلي
وأخرج تاني للدنيا
أعمل اللي عليا
واستنى ربي يفرجها
في معاد محتوم
أنا كائن متقوقع
لكن مش خايب
ولا قليل الحيلة
ومش راضي عن حالي
ولا عن الحلوة بلادي
وبدور بالعقل ع حلول
ومسيري في يوم
أقلب للدنيا من تاني
ويسمع حسي كل الكون
أنا كائن متقوقع
لكني غلباوي
في ثانية أثور
على ظلم الكون
http://kenanaonline.com/users/ALWATANULARABY/posts/540308
الثلاثاء، 3 ديسمبر 2013
ثورة افكار وحياة #حوليات
قالوا
هذي ليست ثورة
هذه ليست سوى فتنه
لضعاف نفوس وتدين
تمت دون حياء
رموا من عارض منهجهم
بالإلحاد ومحاربة الإسلام
قالوا عبيد بياده
وهوجه عميان بغباء
تناسوا أن الأمة ضجت
كرهت عبادة رأس
فالله ميز بالعقل
بنو آدم وحواء
أشعلوا نارا بدماء مواليهم
ضحوا بأخلاق ومبادئ
مقابل سلطه دنيا
ما خافوا للمولى لقاء
قالوا سوف نحارب إخوتنا
لننال جهادا في سبيل الله
قريبا سوف يكافئنا الجبار
على رؤوس الأشهاد دون عناء
هذي ليست ثورة
قُلنا هذه محاولة
فشلت أم نجحت
لتغير أفكار وحياة
#ليل
#انجي_مطاوع
الاثنين، 2 ديسمبر 2013
يا .. #حوليات
يا مجاهد متحامي في
عباية الموت
يا ثائر مسنود على
قاتل جوه تابوت
يا مناضل متغطي
بنجوم بطن الحوت
يا محارب بجهل مغطية
بعلو الصوت
يا معلم متعلم بضمير
الماضي المخفوت
يا عالم متعامل
بوجوب خوف وسكوت
يا مدافع بمدافع ضرب
وظلم الجبروت
يا ناظر متناظر على
الدنيا بكلام مرفوض
يا حاكم متحكم بتخلف
أشكيف مخطوف
فوق وأصحى راح زمنك
وزمن الخوف
وماشين مليون خطوة
في طريق النور
خطوينا تسبق خطويك
يا ملك الزور
الأحد، 1 ديسمبر 2013
أبو الهول نطق #حوليات
يلا سلام أشوفكم بخير
وبكرة من تاني نشوف الدنيا فيها إيه
ده أنا من اللي شفته في البلد
وقعت نمت من التعب
دي بلد فيها العجب
وكل يوم مغطيها الزهق
فيها اللي عامل شيخ
واللي عامل متعلم محترم
وهما تعليم خليط هجين
قسموا البلد ما بين
شريعة أو قلة أدب
والحكاية ببساطة
حاكم ضعيف
وقعه الأحبة
قبل المعارضين
ويرجعوا يقولوا
أبو الهول يا خواتي
نطق :)
الاشتراك في:
الرسائل (Atom)